काठमाडौँ । सिद्धार्थ बैंकले सेयर धितो कर्जाका लागि अनलाइन आवेदन सुविधा सञ्चालनमा ल्याएको छ। ग्राहकले आफ्नो सेयर धितो राखेर कर्जा लिन बैंकको मोबाइल बैंकिङ एपमार्फत आवेदन दिन सक्ने भएका हुन्।
बैंकका अनुसार ग्राहकले ‘बैंकस्मार्ट एक्सपी’ एपको ‘इजी लोन’ अन्तर्गत ‘लोन सर्भिसेज’मा गई ‘लोन अगेन्स्ट सेयर’ विकल्पबाट आवेदन दिन सक्छन्। ग्राहकको तत्कालीन वित्तीय आवश्यकतालाई सहज रूपमा सम्बोधन गर्ने उद्देश्यले सुविधा ल्याइएको बैंकले जनाएको छ।
यस सुविधाअन्तर्गत धितो राखिने सेयरको मूल्याङ्कनका आधारमा ७० प्रतिशतसम्म कर्जा लिन सकिने बैंकको विज्ञप्तिमा उल्लेख छ। व्यक्तिगत तथा व्यावसायिक वित्तीय आवश्यकता पूरा गर्न सेवाले सहयोग पुग्ने बैंकको विश्वास छ।
सेयर धितो कर्जा सेवा बैंकका सबै शाखामा उपलब्ध रहेको जनाइएको छ। सुविधाबारे थप जानकारी लिन चौबीसै घण्टा सञ्चालनमा रहेको ग्राहक सेवा केन्द्र ‘सिद्धार्थ केयर’मा सम्पर्क गर्न सकिने बैंकले जनाएको छ।
उपलब्ध विज्ञप्तिमा कर्जाको ब्याजदर, सेवा शुल्क, अवधि र स्वीकृतिका विस्तृत सर्त भने खुलाइएको छैन।
