काठमाडौँ । नेपाल एसबीआई बैंकले चालु आर्थिक वर्ष २०८३/८४ को पहिलो त्रैमासमा ५५ करोड २२ लाख रुपैयाँ खुद नाफा आर्जन गरेको छ । यो गत आर्थिक वर्षको सोही अवधिको तुलनामा १०.१० प्रतिशत बढी हो । गत वर्षको पहिलो त्रैमासमा बैंकले ५० करोड १६ लाख रुपैयाँ खुद नाफा कमाएको थियो ।
बैंकले सार्वजनिक गरेको अपरिष्कृत वित्तीय विवरणअनुसार समीक्षा अवधिमा खुद नाफा, निक्षेप संकलन तथा कर्जा प्रवाहमा वृद्धि भएको छ । तर, बैंकको खुद ब्याज आम्दानी भने घटेको छ ।
चालु आर्थिक वर्षको पहिलो तीन महिनामा बैंकको खुद ब्याज आम्दानी १ अर्ब २६ करोड ९७ लाख रुपैयाँ रहेको छ । गत आर्थिक वर्षको सोही अवधिमा यस्तो आम्दानी १ अर्ब ३१ करोड रुपैयाँभन्दा बढी थियो ।
समीक्षा अवधिमा बैंकले शुल्क तथा कमिसनबाट ३६ करोड ७० लाख रुपैयाँ खुद आम्दानी गरेको छ । त्यस्तै, धितोपत्र तथा अन्य कारोबारबाट ११ करोड १४ लाख रुपैयाँ आम्दानी गरेको छ । यी आम्दानीसहित बैंकको कुल सञ्चालन आम्दानी १ अर्ब ७६ करोड ५८ लाख रुपैयाँ पुगेको छ ।
बैंकको सञ्चालन नाफा ७८ करोड ३४ लाख रुपैयाँ रहेको छ भने करअघिको नाफा ७८ करोड ८८ लाख रुपैयाँ पुगेको छ ।
निक्षेप संकलनतर्फ बैंकले उल्लेख्य प्रगति गरेको छ । असोज मसान्तसम्म बैंकले २ खर्ब ३९ अर्ब ५२ करोड ९३ लाख रुपैयाँ निक्षेप संकलन गरेको छ । गत आर्थिक वर्षको अन्त्यमा बैंकको कुल निक्षेप २ खर्ब १२ अर्ब ८२ करोड ६४ लाख रुपैयाँ थियो । यसअनुसार बैंकको निक्षेप २६ अर्ब ७० करोड रुपैयाँभन्दा बढीले वृद्धि भएको हो ।
त्यसैगरी, बैंकको कर्जा लगानी पनि बढेको छ । गत आर्थिक वर्षको अन्त्यमा १ खर्ब ४६ अर्ब ७७ करोड रुपैयाँ रहेको कर्जा प्रवाह चालु आर्थिक वर्षको असोज मसान्तसम्ममा बढेर १ खर्ब ५० अर्ब ५० करोड रुपैयाँ पुगेको छ ।
यद्यपि, बैंकको खराब कर्जा अनुपातमा सामान्य वृद्धि देखिएको छ । गत आर्थिक वर्षको पहिलो त्रैमासमा ३.०१ प्रतिशत रहेको निष्क्रिय कर्जा चालु आर्थिक वर्षको सोही अवधिमा बढेर ३.१९ प्रतिशत पुगेको छ ।
बैंकको वार्षिकीकृत प्रतिसेयर आम्दानी (ईपीएस) १९ रुपैयाँ ४९ पैसा कायम भएको छ । त्यस्तै, प्रतिसेयर नेटवर्थ १९९ रुपैयाँ ६६ पैसा रहेको बैंकको वित्तीय विवरणमा उल्लेख छ ।
