काठमाडौँ । मुक्तिनाथ विकास बैंकले चालु आर्थिक वर्ष २०८३/८४ को पहिलो त्रैमासमा उल्लेख्य नाफा वृद्धि गरेको छ । बैंकले सार्वजनिक गरेको अपरिष्कृत वित्तीय विवरणअनुसार असोज मसान्तसम्ममा ३२ करोड २४ लाख रुपैयाँ खुद नाफा आर्जन गरेको हो ।
यो नाफा गत आर्थिक वर्षको सोही अवधिको तुलनामा ४३.४४ प्रतिशत बढी हो । गत वर्षको पहिलो त्रैमासमा बैंकले २२ करोड ४७ लाख ७४ हजार रुपैयाँ खुद नाफा कमाएको थियो ।
समीक्षा अवधिमा बैंकको खुद ब्याज आम्दानी पनि बढेको छ । गत वर्षको असोजसम्ममा १ अर्ब १८ करोड ५५ लाख १० हजार रुपैयाँ रहेको यस्तो आम्दानी चालु आवको पहिलो त्रैमासमा बढेर १ अर्ब २१ करोड ७६ लाख रुपैयाँ पुगेको छ ।
त्यस्तै, बैंकको खुद शुल्क तथा कमिसन आम्दानी २२ करोड रुपैयाँ नाघेको छ । गत वर्षको सोही अवधिमा बैंकले यस शीर्षकबाट १२ करोड ७० लाख ८३ हजार रुपैयाँ आम्दानी गरेको थियो ।
बैंकको वितरणयोग्य नाफा ६१ करोड ५६ लाख ६ हजार रुपैयाँ पुगेको छ । यससँगै बैंकको लाभांश क्षमता ७.६९ प्रतिशत कायम भएको छ । प्रतिसेयर आम्दानी (ईपीएस) पनि ११.२४ रुपैयाँबाट बढेर १६.१२ रुपैयाँ पुगेको छ । बैंकको प्रतिसेयर नेटवर्थ १६५.६७ रुपैयाँ र मूल्य आम्दानी अनुपात २१.३४ गुणा रहेको छ ।
निक्षेप तथा कर्जा विस्तारमा पनि बैंकले वृद्धि गरेको छ । असोज मसान्तसम्ममा बैंकले १ खर्ब २६ अर्ब २५ करोड ८२ लाख रुपैयाँ निक्षेप संकलन गरेको छ । गत वर्षको सोही अवधिमा यस्तो निक्षेप १ खर्ब २३ अर्ब ५३ करोड ९४ लाख रुपैयाँ थियो । यसअनुसार बैंकको निक्षेप २.२० प्रतिशतले बढेको हो ।
त्यसैगरी, बैंकको कर्जा तथा सापट रकम ४.९४ प्रतिशतले वृद्धि भएर १ खर्ब ५ अर्ब ४७ करोड रुपैयाँ पुगेको छ । गत वर्षको असोजसम्ममा बैंकको कर्जा लगानी १ खर्ब ५० करोड रुपैयाँ रहेको थियो । समीक्षा अवधिमा बैंकको कर्जा लगानी ४ अर्ब ९६ करोड ४५ लाख रुपैयाँले बढेको हो ।
बैंकको कुल सम्पत्ति १ खर्ब ४४ अर्ब २२ करोड रुपैयाँ पुगेको छ । सञ्चालन खर्च नियन्त्रण र कर्जा नोक्सानी व्यवस्थापनमा भएको सुधारले सञ्चालन मुनाफा बढाउन सहयोग पुगेको बैंकले जनाएको छ ।
यद्यपि, बैंकको खराब कर्जामा भने दबाब देखिएको छ । गत आर्थिक वर्षको असोज मसान्तमा ४.०३ प्रतिशत रहेको खराब कर्जा अनुपात चालु आवको सोही अवधिमा बढेर ४.७३ प्रतिशत पुगेको छ । यसले नाफा र आम्दानीमा सुधार भए पनि बैंकको कर्जा गुणस्तरमा चुनौती थपिएको संकेत गरेको छ ।
