काठमाडौं । नेपाल राष्ट्र बैंकले दसैँ, तिहार र छठ पर्वलाई लक्षित गर्दै डिजिटल वालेटमा रकम जम्मा गर्न पाउने सीमा बढाएको छ । केन्द्रीय बैंकले भुक्तानी प्रणालीसम्बन्धी एकीकृत निर्देशन संशोधन गर्दै वालेटमा रकम जम्मा गर्न सकिने दैनिक सङ्ख्या बढाएको हो ।
संशोधित व्यवस्थाअनुसार अब प्राकृतिक व्यक्तिले चाडपर्वको अवधिमा एक दिनमा अधिकतम ५० पटकसम्म वालेटमा रकम जम्मा गर्न सक्नेछन् । यसअघि यस्तो सुविधा दिनमा १० पटकसम्म मात्र उपलब्ध थियो ।
राष्ट्र बैंकका अनुसार यो सुविधा असोज ३१ गतेदेखि कात्तिक ८ गतेसम्म र कात्तिक २१ गतेदेखि २९ गतेसम्म लागू हुनेछ ।
चाडपर्वका बेला किनमेल, आर्थिक कारोबार तथा रकम स्थानान्तरण बढ्ने भएकाले सेवाग्राहीलाई डिजिटल भुक्तानीमा सहजता प्रदान गर्न सीमा बढाइएको हो ।
राष्ट्र बैंकले नगद कारोबारको विकल्पका रूपमा डिजिटल भुक्तानीलाई प्रोत्साहन गर्दै आएको छ । वालेटमा रकम जम्मा गर्न पाउने सङ्ख्या बढाइएसँगै चाडपर्वको समयमा डिजिटल कारोबार गर्ने सेवाग्राहीलाई थप सहज हुने अपेक्षा गरिएको छ ।
