काठमाडौँ । गण्डकी प्रदेश सरकारका उद्योग तथा पर्यटनमन्त्री यसोधा रिमालले प्रदेशमा उद्योग तथा पर्यटन क्षेत्रमा चिनियाँ लगानी भित्र्याउने उद्देश्यसहित चिनियाँ उद्योगी व्यवसायीसँग भेटवार्ता गरेकी छिन् । शनिबार पोखरास्थित ग्राण्ड होटेलमा भएको उक्त भेटमा दुवै पक्षबीच सहकार्यका सम्भावनाबारे विस्तृत छलफल भएको हो।
भेटका क्रममा उद्योग तथा पर्यटन क्षेत्रका वर्तमान गतिविधि, आगामी योजना र देखिएका चुनौतीबारे खुला छलफल भएको मन्त्री रिमालले जानकारी दिईन । उनले गण्डकी प्रदेशलाई समृद्ध बनाउन उद्योग र पर्यटन क्षेत्रलाई मुख्य आधारका रूपमा विकास गर्न आवश्यक रहेको उल्लेख गर्दै विदेशी लगानीकर्तासँग सहकार्यलाई प्राथमिकता दिएको बताईन ।
चिनियाँ व्यवसायीको टोलीको नेतृत्व गरेका वु चाओले आफू संलग्न विभिन्न परियोजना तथा नेपाल–चीन सहकार्यमा सञ्चालन भइरहेका कार्यक्रमबारे जानकारी गराउँदै भविष्यमा थप लगानी विस्तार गर्न इच्छुक रहेको धारणा राखे । उनले नेपाल, विशेषगरी पोखरा क्षेत्र, पर्यटन र उद्योग दुवैका लागि आकर्षक गन्तव्य रहेको बताए ।
मन्त्री रिमालले पर्यटकीय राजधानीका रूपमा चिनिने पोखरामा चिनियाँ व्यवसायीलाई स्वागत गर्दै मन्त्रालयले अघि सारेका योजना र नीतिगत सुधारबारे पनि जानकारी गराएकी थिइन ्। उनले आपसी सहकार्य र समन्वयमार्फत गण्डकी प्रदेशमा नयाँ उद्योग स्थापना तथा पर्यटन प्रवर्द्धनमा उल्लेख्य प्रगति हासिल गर्न सकिने विश्वास व्यक्त गरेको मन्त्रीका स्वकिय सचिव अनुज अधिकारीले जानकारी दिए ।
उनका अनुसार सो भेटघाटका क्रममा नेपाली र चिनियाँ व्यवसायीबीच अनुभव आदानप्रदानसमेत गरिएको थियो। दुवै पक्षले आगामी दिनमा ठोस परियोजनामा सहकार्य गर्ने समझदारी बनाउँदै लगानीमैत्री वातावरण निर्माणमा जोड दिएका छन्।
