काठमाडौँ । निर्वाचन आयोगले अदालतको आदेश नआउँदासम्म मतपरिणाम घोषणा नगर्न निर्वाचन आयोगले सम्वन्धित निर्वाचन कार्यालयलाई निर्देशन दिएको छ ।
उक्त निर्वाचन क्षेत्रमा राष्ट्रिय स्वतन्त्र पार्टीका उम्मेदवार किशोरी साहको निर्माण कम्पनी कालोसूचीमा परेको भन्दै अन्तिम समयमा आयोगले उनको उम्मेदवारी खारेज गरेको थियो ।
तर मतदाताले उनकै चुनाव चिन्हमा भारी मत दिएपछि मतगणनामा समेत अन्योलता सिर्जना हुँदै आएको थियो । सम्वन्धित कार्यालयले आयोगमा आवश्यक निर्देशनका लागि आग्रह गरेअनुसार आज आयोगले मतपरिणाम तत्काल घोषणा नगर्न भनेको हो ।
किशोरी साहको उम्मेदवारी सदर भएमा उनी नै रास्वपाबाट विजयी हुनेछन् । उनले आफ्नो उम्मेदवारी खारेज गर्ने आयोगको निर्णयविरुद्ध अदालतमा निवेदन दिएका छन् । उक्त निवेदनमा अदालतको फैसला आउन बाँकी छ ।
