काठमाडौं । बनेपा नगरपालिका–९ बाट ७३० राउण्ड गोलीसहित आठ जनालाई प्रहरीले शनिबार साँझ पक्राउ गरेको छ।
पक्राउ पर्नेहरूमा बनेपा नगरपालिका–९ का २६ वर्षीय सिजन सुवाल, २८ वर्षीय सुवास गौतम, १८ वर्षीय किशोर, १५ वर्षीय बालक, बारा घर भएका २० वर्षीय महेश मुखिया, मकवानपुर बकैया गाउँपालिका–६ का २४ वर्षीय सुशान्त लो, तेमाल गाउँपालिका–२ का २१ वर्षीय तिमोथी तामाङ र पनौती नगरपालिका–१० का ३४ वर्षीय अछुत खड्का रहेका छन्।
जिल्ला प्रहरी कार्यालय काभ्रेबाट खटिएको टोलीले उनीहरूलाई नियन्त्रणमा लिएको हो। पक्राउ परेका व्यक्तिहरूमाथि आवश्यक अनुसन्धान भइरहेको प्रहरीले जनाएको छ।
